ក្រោយផ្ទុះរឿងមានស្នេហ៍ជាមួយប្រុសក្មេង ឥឡូវ ដួង ម៉ានិច ឆក់បានតំណែងធំ!

ក្រោយពីស្ថានីយទូរទស្សន៍លេខ៥ បានធ្វើពិធីក្រុងពាលីចេញថតរឿងថ្មី ទើបដឹងថា កញ្ញា ដួង ម៉ានិច បានឆក់យកតំណែងតួឯកទៅហើយ ក្រោយពីមួយរយៈកន្លងមកនេះ នាងបាន និងកំពុងតែល្បីមានស្នេហាខុសវ័យជាមួយប្រុសក្មេងឈ្មោះលោក បុត្រ។

រឿងថ្មីនេះមានចំណងជើងថា "អន្ទាក់ស្នេហ៍" ដែលកញ្ញា ដួង ម៉ានិច បានចាប់ដៃគូជាតួឯកស្រី ប្រុសជាមួយលោក មង្គម តារាសម្ដែងប្រុសរូបសង្ហាដែលមានវ័យច្រើនល្មមសាកសមនឹងគ្នា។ តំណែងនេះ ត្រូវបានប្រកាសនៅក្នុងពិធីក្រុងពាលីរឿងភាគថ្មី “អន្ទាក់ស្នេហ៍” របស់ស្ថានីយទូរទស្សន៍លេខ៥ថ្មីៗនេះ។ រឿងនេះក៏បានប្រកាសថា នឹងថតរយៈពេលបីខែ ដែលធ្វើឱ្យនាង និងប្រុសក្មេងលោក បុត្រ ត្រូវឃ្លាតឬយ៉ាងណា?

តំណែងដ៏សំខាន់ក្នុងខ្សែរឿងខាងលើ ត្រូវបានអ្នកដឹកនាំកម្មវិធីរបស់ទូរទស្សន៍នេះបានពន្យល់ថា កញ្ញា ដួង ម៉ានិច ពិតជាសាកសម ដោយសារតែនាងមានសមត្ថភាព ហើយរឿងភាគលើកមុនៗ ក៏ម៉ានិច បានកសាងកេរ្តិ៍ឈ្មោះ ដោយបានទទួលការគាំទ្រ និងការលើកសរសើរជាច្រើនដែរ។

ម្យ៉ាងទៀតលោកលើកឡើងថា ការដែលនាង បានផ្ទុះរឿងមានទំនាក់ទំនងស្នេហាផ្អែមល្ហែមជាមួយតារាវ័យក្មេងលោក បុត្រ ធ្វើឱ្យផ្អើលពេញបណ្ដាញសង្គមនោះ ក៏ជាហេតុដែលលោកយល់ថា ការដាក់នាងឲ្យមកជាតួឯកស្រីប៉ះជាមួយបុរសវ័យកណ្ដាល ដូចជាលោក មង្គល នឹងទទួលបានការគាំទ្រ និងជោគជ័យដែរ។

វិលមកកញ្ញា ដួង ម៉ានិច វិញបានប្រាប់ឱ្យដឹងថា សម្រាប់រឿងភាគថ្មីនេះ នាងមិនផលប៉ះពាល់អ្វីឡើយសម្រាប់នាង និងលោក បុត្រ នោះ ប៉ុន្តែនាងសប្បាយចិត្តទៅវិញនៅពេលបានសម្ដែងជាតួឯកស្រី មកជួបលោក មង្គល។ សម្រាប់នាងគ្មានបញ្ហាអ្វីនោះទេ ហើយថា ការបានឱកាសមកថតរឿងភាគឱ្យស្ថានីយទូរទស្សន៍ខាងលើ គ្រានេះ ជារឿងល្អ និងជាឱកាសថ្មីរបស់នាងទៅវិញ។

តារាសម្ដែងសិចស៊ីរូបនេះបានបញ្ជាក់ថា រឿងភាគ “អន្ទាក់ស្នេហ៍” នាងសម្ដែងជាតួស្រី ក្រមុំស្រស់ស្អាត ជាប់លំដាប់សេដ្ឋីនី ជាមនុស្សមិនងាយទទួលព្រមចំពោះអ្នកណាងាយៗនោះទេ។ រឿងនេះអ្វីដែលពិសេសនោះ នាងដើរតួជាស្រីលំដាប់អ្នកមាន ហើយប្តីបីនាក់ ដែលប្តីទាំងនោះសុទ្ធតែស្លាប់ដោយគ្រោះថ្នាក់ចរាចរណ៍ រហូតអ្នកណាក៏ចង់ខ្លាចនាងដែរ។ ក្នុងរឿងនេះ សង្គមហៅតួស្រីនេះជាស្រីចង្រៃ ប៉ុន្តែស្រាប់តែនៅមានតួឯកប្រុស ម្នាក់ទៀតបានលង់ស្នេហ៍ ដោយមិនខ្លាចស្លាប់ដូចអ្នកបីនាក់មុនឡើយ។ តើមានមូលហេតុអ្វីខ្លះ? ម៉ានិច ស្នើឲ្យរង់ចាំតាមដានទាំងអស់គ្នា។

រឿង "អន្ទាក់ស្នេហ៍" ត្រៀមនឹងថតនាពេលឆាប់ៗនេះ ដោយក្រោយចំណាយរយៈពេលបីខែ ដើម្បីសម្រិតសម្រាំងគុណភាព ទុកជាកាដូដល់ជូនទស្សនិកជន។ រឿងនេះក្រៅពីតួឯកទាំងពីរខាងលើ មានតារាជាច្រើនទៀតដូចជា កញ្ញា រ៉ូហ្សា កញ្ញា ដានី អារីយ៉ា កញ្ញា ចាន់ ស្រីរ័ត្ន កញ្ញា មូនណា អ្នកនាង ញឹម ចាន់ថន តារាកំប្លែងលោក ចេឡា លោក រិទ្ធី, លោក យុទ្ធ ឋានៈ, លោក គង់ សុភី, អ្នកស្រី ញឹម សុខា និងអ្នកស្រី វណ្ណា ជាដើម៕